Agudazgazva Liunosuge(Nyaedbonj)



Hauqcingq Bouxdwkfwnz Haenx Bouxhak Cam

Dwg, boux bungzraen gaiq ndangdai haenx, goj dwg hoiq. Haetromh neix, hoiq bae laeng bya faenz gosa lumj baeznaengz, bungz raen gaiq ndangdai haenx youq ndaw ndoengndoek laeng bya. Dieg ndangdai youq? Liz Roenyik Yamasina saek leix yienghneix, ndaw ndoengndoek cab miz saek go faexsa, dieg neix dieg vunz noix bae daengz.

Ndangdai haenx daenj geu buhraez heuhau ndeu, aen mauhndaem baengzsa vunqyiengh ndaw singz ndeu, laemx daengjhai youq dieg haenx. Gwnz ndang de gag deng mid ndeu ndwi, hoeng deng najaek, mbawndoek doek henz ndangdai goj nyumx baenz saekndinglaep liux. Mbouj, lwed goj mbouj lae liux, diegsieng lumj hawq gvaq liux. Lij miz duz nengznyaen ndeu haeb gwnz diegsieng de netnet bae, hoiq byaij henz de goj mbouj swt.

Raen miz saek yiengh lumj cax yiengh neix mbouj raen? Mbouj miz, yiengh lawz goj mbouj miz nauq. Gag diuz cag ndeu ndwi, doek henz goek gosa. Yiengh wnq… Dwg la, youq henz diuzcag, lij miz fag roi ndeu. Henz ndangdai gag song yiengh neix. Hoeng, cazrum caeuq mbawndoek goj deng daemh baenz nyungqnyangq bae, gonq boux vunz haenx deng gaj, itdingh miz mbat hoenxmoeb yakrwix ndeu. Lawz, miz max rox mbouj? Dieg haenx max haeuj bae mbouj ndaej. Roen max byaij youq baih haenx, gek biengh ndoengndoek ndeu.

Hauqcingq Bouxsaeng Haenx Bouxhak Cam

Hoiq ngoenzlwenz bungz bouxsai deng haih haenx. Ngoenzlwenz… W, byonghngoenz yiengh neix. Dieg haenx youq gyang roen daeq Segiyama bae Yamasina. Bouxsai haenx caeuq boux mehmbwk gwih max ndeu caemh roen, bae coh baih Segiyama. Mehmbwk haenx daenj sanaj, yawj mbouj seuq najda, gag raen de daenj geu buh saek hagizgazsa(ndaw heu rog ndinglaep) ndeu. Max dwg maxndokdauz, coeng max daet dinjdinj bae. Max sang lainoix? Miz saek seiq cik seiq conq. Hoiq dwg boux okranz, rox dingz neix noix. Bouxsai… Mbouj, de mbouj gag raek cax, lij raek goengnaq dem. Daegbied dwg aen huqnaq raegndaem haenx, ndaw haet miz naq ngeih cib lai saenq, neix hoiq goj lij roxgeiq seuqsat.

Hoiq faen hwnz goj faen mbouj daengz, boux haenx cix deng huxvang neix. Mingh duh bouxvunz, lumj raemxraiz gyanghaet, goj lumj byajyap byajraez! Gyangz ndaej in ndaej dahraix, hawj vunz mbouj miz hauq naeuz.

Hauqcingq Bouxdangcai Haenx Bouxhak Cam

Bouxlaux cam duz caeg neix hoiq gaeb ndaej? De goj dwg duzcaeg cohndaeng haenx, Daciumaru. Hoeng mwh hoiq gaeb ndaej de, de doek laj max, gyangz youq gwnz giuzrin Avadaguci. Seizcaenz? Dwg it geng haemhlwenz. Mbat gonq hoiq gaeb de deng byoiq, de goj daenj geu buhrog saekheulaep neix, raek caxlaux raizva. Hoeng mbat neix, lumj bouxlaux raen, de lij raek goengnaq. Ou, goengnaq bouxsai deng haih goj dwg gij neix. Yiengh neix, bouxgajvunz gou dwg duz Daciumaru neix dahraix liux. Goengnaeng, huznaq raegndaem, cib caet saenq naqbwnromh, gij doxgaiq neix dwg doxgaiq bouxsai deng haih. Dwg, lumj bouxlaux naeuz, max dwg maxndokdauz coeng dinj. De deng duz haenx ? Roengz laeng max, goek neix dwg bauh’wngq duh goekbyai. Duzmax youq dieg gvaq giuzrin bae naj saek it(di), lij cug ga caggieng raezraez ndeu, gwn nywj henz roen youq.

Naeuz daengz duz Daciumaru neix, de dwg boux ndauq ndeu youq ndaw gyoengq caeg byaijvang youq henz singzgyaeuj. Cawzcou bigvaq, youq gungq bya laeng siengh bouxnaek Bindozla Miuh Doribezdez, mehmbwk baiq baed ndeu caeuq sausawj iq duh de deng gaj bae daengx gouh, neix goj dwg hong rwix duh Daciumaru. Mehmbwk gwih maxndokdauz haenx goj dwg baenz neix, de gaj bouxsai haenx bae liux, mbouj rox guh yiengh lawz coq mehmbwk de bae liux. Gyo nyiuz hoiq naeuz lai, sienq neix lij ruengh bouxlaux caz guh seuq bae.

Hauqcingq Yahgeq haenx Bouxhak Cam

Dwg, bouxdai haenx dwg lwgmbwk hoiq haq doek. Hoeng, de mobuj dwg vunz singzgyaeuj, dwg bouxhoenx ndaw ranzhak gaembiengz duh biengz Vagasa. Coh dwg Ganacava Dagehiro, ngeih cib roek bi. Mbouj, singqgek de unqswnh, mbouj dwg nyex bouxcaeuz.

Bouxlaux cam lwgmbwk hoiq? Lwgmbwk hoiq coh baenz Masagiz, cib gouj bi. Singqgek de ak, mbouj bex hawj bouxsai. Hoeng de gag miz Dagehiro, mbouj miz bouxgyaez wnq. Saeknaeng de ndaem it(di), naj lwggvaq iqiq, gungx da baihswix miz aen rei ndaem ndeu.

Ngoenzlwenz Dagehiro caeuq lwgmbwk hoiq caemh okbae, bae Biengz Vagasa. Daengz laeng ok sienq hux yiengh neix, neix dwg goekbyai yiengh lawz bae. Sienq lwggwiz goj deng nyinh mingh gvaq, hoeng lwgmbwk gou baenz lawz, hoiq sim iu lumj byaeu. Hoiq gyocam bouxlaux, mbouj lwnh baenz lawz, ndei rox raix goj ra roen bae saeuj ok lwgmbwk hoiq. Boux dwghaemz guhdaeuz goj dwg duzcaeg coh baenz Daciumaru, mbouj gag haih lwggwiz hoiq bae, lwgmbwk gou goj...(Daej naeuz mbouj ok)

Hauq Daciumaru

Boux gaj bouxsai haenx goj dwg gou. Hoeng gou mbouj gaj mehmbwk. De bae gyawz liux? Gou goj mbouj rox. E, yaeng gonq, hoenxcam gou baenz lawz, sienq mbouj rox yaek naeuz ok mbouj ndaej nauq. Lij miz, gou ma daengz raq neix liux, goeknduj goj mbouj naemj muenz saek yiengh lumj duz vunz mbouj baenz vunz haenx.

Byonghngoenz ngoenzlwenz gvaq saek it(di), gou bungz raen gouh bouxmaex haenx. Mwh haenx raq rumz baed daeuj, sanaj mehmbwk haenx biu hwnjdaeuj, gou cix ndaej raen naj mehmbwk haenx. Gag raen yaepyet ndwi, cix mbouj raen liux. Aenq dwg ok goek neix, youq ndawa da gou, mehmbwk haenx yaek lumj boux Bouzsat sau ndeu. Yaep haenx, gou goj daengjcaw, langh yaek gaj bouxsai haenx bae, gou goj yaek aeu mehmbwk neix daengz fwngz.

Lawz? Gaj bouxsai haenx, mbouj lumj sou naemj, mbouj dwg sienq hung. Ndeirwix goj deng aeu mehmbwk bae, bouxsai haenx deng dai. Hoeng gou gaj vunz ndeij caxlaux gwnz hwet gou, bouxlaux sou mbouj gaj vunz ndeij cax, gaj ndeij gienz, gaj ndeij ngaenz, gaj ndeij coenz hauq cingz gyaj eiq byangz goj ndaej. Dahraix, roen sou lwed mbouj lae, vunz goj youq ndaej rongh, hoeng roen sou goj dwg gaj vunz. Yaek ma naeuz beu, gaiq beu sou naek gvaq, roxnaeuz gaiq beu gou naek gvaq, mbouj ndei naeuz lu. (aen riunyumj baeh vunz)

Hoeng, langh mbouj gaj bouxsai haenx goj aeu mehmbwk haenx daengz fwngz ndaej, gou goj mbouj miz lawz mbouj rimcaw. Mbouj, mwh haenx ndaw caw gou daengj, mwh aeu mehmbwk bae mbouj gaj bouxsai ndaej goj mbouj gaj. Hoeng, youq gwnz roenyik duh Yamasina guh hong neix mbouj ndaej, gou yaek ra roen lox gouh bouxmaex haenx bae ndaw bya bae.

Hong neix goj mbouj bieng rengz. Gou caeuq gouh bouxmaex haenx caemh roen byaij, daengz laeng goj doxgyaiz. Gou gyaiz daengz, gwnz bya naj baih haenx miz aen moh mwhgonq ndeu, vat okdaeuj yawj, ndaw haenx miz gingq gonq caeuq cax bauj lai, gou guhcaeg aeu gij gaiqbengz neix bae moek youq ndaw ndoengndoek laeng bya, langh miz vunz yaek cawx, gaiq lawz goj gai dwgdwg bae. Bouxsai hwnjgoek ningcaw hawj coenzhauq gou, liux cix… Yiengh lawz, aen iekngah duh vunz dwglau mbouj? Liux cix mbouj daengz donh aen seizsaenz, gouh bouxmaex haenx goj caemh gou gyaep max hwnj roen gwnz bya bae liux.

Ma daengz naj ndoengndoek, gou naeuz, gaiqbengz cix moek youq ndaw neix, haeuj ma yawj nw. Ndaw dungxsaej bouxsai rim ndeij iekngah, mbouj naeuz coenz ndwi, mehmbwk mbouj nyienh roengz max, naeuz yaek gag caj youq baihrog. Ndaw ndoengndoek baenz nyaengq baenz nya, naeuz neix goj mbouj gvaiq. Naeuz dahraix, baenz neix gouj maengx lai lu. Gou goj ce mehmbwk gag youq rog, caeuq bouxsai haenx caemh haeuj ndoengndoek bae.

Ndaw ndoeng miz loengh ndeu gag miz faexndoek seuq, hoeng byaij bae saek cib haj ciengh yiengh neix, goj dwg caz faexsa gvangq saek it(di) ndeu. Gou yaek guh hong gou, dieg haenx dwg dieg ndei guhdaeuz. Gou doq beuj rum doq naeuz byangz lumj coenz dahraix, naeuz gaiqbengz goj youq laj gosa neix. Bouxsai ndaejnyi, goj muengz buet bae gosa byom youq baihnaj. Mwh neix, dou ma daengz dieg ndeu, gondoek bienq caxcax bae, miz saek geij go faexsa, gou goj dumdeng gaemh bouxsai haenx youq laj. De goj dwg boux raek cax dahraix, rengz gen goj hung, hoeng deng gou gaemh dumdeng, mbouj miz roen nei(deuz). Gou cug de coq goek go faexsa ndeu. Cag? Cag ven youq gwnz hwet gou, boux caeg dou goj mbouj rox mwh lawz cix deng hamj ciengz bin dangq, deng yungh cag lai. Gou sonh mbawndoek coq ndaw bak de rim bae mbouj hawj de guh sing, laeng neix goj mbouj miz hong nyaengq liux.

Gou beuj bouxsai bae liux, goj doxdauq bae ra mehmbwk, naeuz bouxsai fwt baenz binghgip, heuh de ma yawj riuzriuz.  Mbouj naeuz lai goj rox, de goj hwnjset liux.Mehmbwk aeu aen gyaep de roengz, ce gou cing fwngz de, haeuj bae ndaw ndoeng. Hoeng haeuj ma ngamq yawj, cix raen bouxsai deng cug youq gwnz gosa. Yaepyet, mehmbwk goj beng fag mid ndongq gyoet ndeu daeq najaek. Mwh neix bae gonq, gou goj caengz raen gvaq mehmbwk ak baenz neix. Langh mwh haenx gou hengq, fag mid haenx yaek ndaemq haeuj ndaw dungx gou. Mbouj, gou nei mbat haenx bae liux, gwq naemj ndaemq gou, gou mbouj deng sieng goj mbouj ngaih. Hoeng, raeuz dwg Daciumaru, goj mbouj yungh dawz cax, cix cuk fag mid de doek bae liux. Mehmbwk ak baenz yiengh lawz bae, gwnz fwngz mbouj dawz doxgaiq, goj mbouj miz roen. Doeklaeng, gou goj ndaej guh hong ndaw caw gou naemj, mbouj gaj bouxsai haenx, cix ndaej mehmbwk neix daengz fwngz.

Mbouj gaj bouxsai, dwg, laeng haenx gou goj mbouj naemj gaj bouxsai haenx. Hoeng, mwh gou ce mehmbwk laemx laj daej haenx, mehmbwk haenx goj gaem gen gou lumj yaek bag, heuh mbouj baenz coenz laebdaeb. Coenz de naeuz dwg, “mwngz dai goj ndaej, boux gou dai goj ndaej, youq naj song bouxsai doeknaj, caw gou in gvaq dai. Song sou dai boux lawz, gou goj riengz boux youq bae.” De doq diemcaw sing hung doq naeuz gij hauq neix. Mwh haenx, gou fwt miz caw bae gaj bouxsai haenx. (Angqfaengz ok aen caw naiq laep)

Nyi gou naeuz yiengh neix, sou yaek naeuz gou yakrwix lai. Hoeng, sou caengz ndaej raen mbaw naj mehmbwk haenx, sou caengz ndaej raen yaep haenx, lwg da lumj feiz byaeu haenx duh de. Gou naemj, byaj bag mbwn dat gou goj yaek aeu mehmbwk neix guh maex. Gou yaek aeu de guh maex, ndaw caw gou gag miz aen naemj neix. Aen neix mbouj lumj sou naemj, dwg gijmaz iekngah daemq yak. Mwh haenx langh gou gag miz iekngah, mbouj miz gij wnq, gou yaek dik mehmbwk haenx liux cix nei bae. Yiengh haenx, fag cax hung gou goj mbouj deng nyumx lwed bouxsai haenx. Hoeng, youq ndaw ndoengndoek laepngauq, gou cimyawj mbaw naj mehmbwk haenx, yaep haenx gou rox liux, langh gou mbouj gaj bouxsai haenx, gou nei gizhaenx mbouj ok.

Hoeng, langh yaek gaj bouxsai haenx, gou goj mbouj naemj guh roen daemq roen yak. Gou gej cag bouxsai haenx, hawj de caeuq gou doxdax roen cax. (Diuzcag ce coq goek gosa, gou lumz youq mwh haenx.) Bouxsai haenx fwt bienq saek, beng caxraek gvangq de ok, coenz ndeu mbouj miz, goj coemj ma baih gou. Dou doxdax baenz lawz, goj mbouj yungh naeuz liux. Mbat ngeih cib sam, cax gou ndaemq ndang de byoengq. Mbat ngeih cib sam, gaej lumz, daengz neix daeuj, gou lij boiqfug de dahraix dem. Boux caeuq gou doxdax ngeih cib mbat ndaej, lajmbwn gag de boux ndeu. (Riunyumj ndeiyouq)

Mwh bouxsai laemx, gou cuengq fag cax hung uq lwed roengz, dauq gyaeuj bae ra mehmbwk. Hoeng, baenz lawz? Mehmbwk mbouj raen liux. Gou ra youq gyang caz faexsa, yawj mehmbwk nei bae dieg lawz liux, hoeng gwnz mbaw ndoek youq laj goj ra mbouj raen riz. Gou daengj rwz ma nyi, gag ndaejnyi sing diemcaw boux yaek dai youq gyang hoz bouxsai haenx.

Mwh dou hwnjgoek doxdax, mehmbwk haenx ok ndonj ok ndoengndoek bae heuh gouq mingh liux goj baenz ndaej. Naemj daengz gizneix, yaek minq mingh gou dem. Gou goj bae aeu caxraek caeuq goengnaq bouxsai haenx, nei ok ndoengndoek, bae daengz roen bya dieg gaeuq. Duzmax mehmbwk lij gwn rum caemcaem youq dieg haenx. Laeng haenx, goj mbouj yungh naeuz liux. Gonq caengz daengz singz gyaeuj, gou goj gai fag caxraek haenx bae liux. Gou goj naeuz baenzlai liux. Gonq gou goj rox liux, vangraeh aen gyaeuj gonq yaek ven youq gwnz faexrenh naj dou lauz hawj vunz lai raen. Gyo buenq gou dai goj ndaej liux. (Daengj aek daengj gyaeuj)

Hauqhit Mehmbwk Ma Daengz Miuhraemxsaw

Bouxsai daenj buhrog saekheulaep guh sienq rwix coq hoiq liux, cix muengh boux hoiq deng cug haenx riu de. Boux hoiq hoznyaek baenz lawz bae goj mbouj rox. Hoeng, mbouj lwnh de cukcak yiengh lawz, gag guh hawj diuzcag cug de haen gvaq. Hoiq daeq bae daengz henz ndang boux hoiq, mbouj dwg, hoiq naemj buet bae henz ndang de, hoeng bouxsai haen ga ndeu goj dik hoiq laemx youq laj. Goj dwg mwh haenx, hoiq raen ndaw da boux hoiq yap ok dingz nditndongq ndeu hauq naeuz mbouj ok. Naeuz mbouj ok, daeuj daengz mwh neix, ngeix daengz saekda de, gou lij ndangsaenz mbouj daengz ndaej. Boux hoiq mobuj naeuz saek coenz, hoeng saekda yaep haenx naeuz daengx caw de liuxliux bae liux. Gaiq ndongq youq ndaw da de, mbouj dwg hozndat, mbouj dwg siengsim, gag miz nditndongq yawjdaemq caeuq gyoetnae. Saekda boux hoiq guh hawj hoiq ciegcaw naetnaiq cawcieg, naek gvaq deng bouxsai haenx dik laemx, gou heuh sing hung ndeu, cix laemxmauh roengz bae.

Caj daengz hoiq ndiu, bouxsai daenj buhrog saek heulaep haenx goj mbouj rox liux, gag miz boux hoiq lij deng cug youq goek faexsa. Hoiq youq gwnz mbawndoek hwnq daeuj dwgrengz dwgrengz bae, liux cix cimyawj mbaw naj boux hoiq. Hoeng, saekda de caeuq haxbaenh mbouj bienq saek noix, mbouj gag miz yawjdaemq yawjmbang, lij conh ok aen caengz aen yiemz. Hoznyaenq, hozsieng, hozndat… Ndaw hoz hoiq mwh haenx, mbouj rox naeuz yiengh lawz cij ok. Hoiq hwnjsoengz bibuengq, byaij daengz henz ndang boux hoiq.

“Beix, byaij daengz dingz neix, beix caeuq nuengx caemh youq goj mbouj miz roen liux. Nuengx daengjcaw yaek dai, hoeng… Hoeng, beix goj deng dai. Beix raen sienq najnyaenq duh nuengx, nuengx ce beix youq boux ndeu mbouj ndaej.”

Hoiq naeuz gij hauq neix hoj yaek dai bae. Baenz yiengh neix bae, boux hoiq goj lij gag yawj hoiq ndeij caengzyiemz. Hoiq aekin yaek dek, buek mingh nyaenx in, bae ra caxraek boux hoiq. Hoeng, ndaw ndoeng mbouj gag mbouj miz caxraek, goengnaq goj mbouj raen liux. Aenq deng duzcaeg haenx raeg bae liux. Gyo’mbaiq fagmid lij youq, goj doek youq laj din hoiq. Hoiq yaengx fagmid hwnj, naeuz hawj boux nyi,

“Gyo hawj mingh nuengx nw, nuengx yaek riengz laeng buenx beix.”

Nyi coenzhauq neix, boux hoiq doeklaeng goj ning naengbak saek mbat liux. Dwg, ndaw bak de sonh mbawndoek rim, saek sing goj ndaeng mbouj ok. Hoeng hoiq ndaej raen naj de, doq rox de naeuz lawz liux. De naeuz coenz hauq ndeu ndeij dadaemq coq hoiq, “gaj vei”. Baenz neix liux, yaek lumj youq mbiengj faen mbiengj ndiu, hoiq ndaemq fagmid haeuj najaek buh saekheusaw boux hoiq.

Laeng neix, hoiq laemx mauh baez moq. Doeklaeng daengz mwh hoiq ndiu, yawj seiqhenz, boux lij deng cug youq, gatcaw dai bae liux. Hoeng… Hoeng, hoiq baenz lawz liux? Hoiq mbouj miz damj naeuz ok bak. Baenz lawz goj ndaej, hoiq goj mbouj miz damj bae dai. Hoiq aeu fagmid ma ndaemq hoz, dauq daengz bae dinbya diuq raemx gaj ndanggaeuq, sawq bae lai diuz roen, goj dai mbouj baenz. Duz hoiq baenz yiengh neix, lij miz naj yiengh lawz. (Riunyumj Mbwqcaem) Mehmbwk yiengh mbouj baenzyungh lumj hoiq, mehmbwk deng duzcaeg yoegyamx, yaek guh lawz cij ndaej? Hoiq yaek… Hoiq… (Fwt daej haemz daej hoj mbouj daengz)

Hauq Fangz Naeuz Ndeij Bak Yahgimq

Duzcaeg ciem aeu maex gou bae liux, naengh youq gizhaenx naeuz gij coenz unq hauq van, nai de lox de. Gou guh sing mbouj ok, lij deng cug youq goek faexsa. Hoeng, mboengq haenx, gou yienh saekda hawj maex, yaek naeuz hawj de, gaej deng bouxsai haenx lox, coenzhauq de coenz byangz liuxliux. Hoeng maex gou naengh doekcaw doekhoen youq gwnz mbawfaex doek, cimyawj gyaeujhoq ndanggaeuq mbouj ning. Yawj bae goj lumj coenzhauq duzcaeg naeuz haeuj bae daengz ndaw caw de liux. Gou hozhaenz lai goj gwq cak gwq ndengj. Hoeng, duzcaeg haenx lij naeuz coenz hauq lox vunz moq dem, naeuz mbouj rox liux. Duzcaeg naeuz, ngoenz lawz deng saet ndang, goj mbouj miz ngoenz caeuq boux youq caemndei ndaej liux, yaek guh maex ndanggaeuq de ndei gvaq, ndanggaeuq de gyaez de lai, cij guh sienq yakrwix okdaeuj. Duzcaeg haenx naeuz gij hauq mbouj rox nyaenq neix goj naeuz ndaej okdaeuj.

Ndaejnyi gij hauq duzcaeg naeuz, maex gou ngiengx gyaeuj lumj gyaeuj ngunh caengz ndiu. Gou lij caengz raen gvaq maex gou gienghndei lumj mwh haenx, hoeng maex gienghndei youq naj gou han duzcaeg yiengh lawz? Mwh neix gou banhbyaij youq lajndaen, hoeng naemj daengz hauqhan maex gou, lij mbaet hozndat mbouj ndaej. Maex gou naeuz seuqseuq, “Yiengh neix, beix daz nuengx bae nw, bae gizlawz goj ndaej.” (Gaiqcaem raeznanz)

Aen beu maex gou mbouj gag miz dingz neix. Langh gag baenz yiengh neix, mwh neix gou youq gyang gaiqlaep, lij mbouj getin baenz neix. Maex gou lumj faen hwnz, deng duzcaeg cing fwngz, byaij coh baihrog ndoengndoek. De fwt bienq saeknaj, vix gaiq gou deng cug youq gwnz faexsa haenx, heuh naeuz:“Gaj de bae! Langh naeuz boux neix lij youq, nuengx bae riengz beix mbouj ndaej!” De lumj fatbag, heuh bae geij baez “gaj de bae!”  Coenzhau neix lumj rumzhaenq fwnraq, daeuj daengz mwh neix goj lij boq gou soen gou, hawj gou soh laemx haeuj dieg laeg guhdaeuz ndaw laepngauq byouqndwi. Coenzhauq dwgcaengz yiengh neix, miz vunz naeuz ndaej ok lwi? Coenzhauq dwgdaen dwgmieng yiengh neix, miz vunz ndaejnyi gvaq lwi? Yiengh neix...(Fwt conh ok raq riu ndeu) Duzcaeg got gen caemcaem, yawj gou, naeuz:“Mwngz yaek guh gijmaz coq mehmbwk neix? Gaj de bae, roxnaeuz langh de bae? Mwngz gag ngaek gyaeuj goj ndaej, gaj de bae?” Gag nyi geij coenz hauq neix, gou goj nyienh nyiuz aen beu duzcaeg neix. (Gaiqcaem raeznanz baez moq)

Mwh gou caengz naemj seuq, maex gou heuh sing hung ndeu, fwt buet haeuj dieg laeg ndaw ndoengndoek bae. Duzcaeg muengz bae gyaep, genhbuh maex gou cix gaem mbouj daengz. Gou gag muengh gingjsaek neix ndwi, lumj ninz ndaek faen hwnz.

Maex gou nei bae liux, duzcaeg aeu caxraek caeuq goengnaq gou bae, dat diuzcug gwnz ndang gou goenq. “Mbat neix daengz gou nei lu.” Mwh ngaeuzndang duzcaeg rwi(siusaet) youq baihrog ndoengndoek, gou ndaej nyi de gag naeuz gag nyi. Mwh haenx bae laeng goj gag lw biengh caemcaem ndwi. Mbouj, lij miz sing daej duh bouxlawz. Gou soeng diuzcag bae, daengj rwz bae nyi. Hoeng, mwh gou roxsingj, gou roxnyinh aen haenx dwg aen sing daej ndanggaeuq gou. (Gaiqcaem raeznanz mbat sam)

Gou doenq ndang naetnaiq gou, daeq goek gosa hwnq daeuj ndeij rengz hoj. Fagmid maex gou deng doek yaep ndit gyoet youq naj youq, gou gip fagmid hwnj, mbat ndeu goj ndaemq haeuj najaek ndanggaeuq. Gaemz lwed ndeu bauq hwnj ndaw bak, hoeng gou goj mbouj roxnyinh getin saek it(di), gag roxnyinh najaek gwq bae gwq nit. Seiqhenz gwq bae gwq caem mbouj miz sing, a, caem baenz yiengh lawz bae. Youq gwnzmbwn ndoengndoek laeng gungqbya neix, duzroeg goj mbouj mbin ma heuh, gag miz ngaeuz da’ngoenz caemcaem, byaifaex fouz youq gwnz gosa. Ngaeuz da’ngoenz… Goj yaengyaeng myox bae, gosa, gondoek goj yawj mbouj raen liux. Gou laemx youq laj, deng gaiqcaem laeglaeg suek youq.

Mwh neix, miz vunz guhraeg ma daengz henz ndang gou. Gou naemj bae yawj de dwg bouxlawz, hoeng henz gou goj yaeng laep bae liux. Dwg bouxlawz, dwg bouxlawz aeu aen fwngz gou yawj mbouj raen, guhraeg beng fagmid najaek gou okdaeuj. Yaep neix, ndaw bak gou bauq hwnjdaeuj baez moq, liux, gou goj ciengxlwenx caem haeuj ndaw gaiqlaep biengz lajndaen bae...